وجهة نظر  / ترونس بريس

__________________

خصكم تشجعو المهرجانات والتظاهرات ماشي تفكرو تهرسوهم وتشوشو على صحابهم

في المهرجانات الدراوش كايدورو الحركة وكايولي الرواج، كلشي كايبيع ويشري من مول القهوة و الجزار حتى لمول الكلية والصوفة لحلوة والزريعة وطايبو هاري ، الطاكسيات كايخدمو الكارديانات كايخدمو،ولاد علي كايخدمو ” الا محضاش راسو بنادم” بالعكس المهرجانات مزيانين ، بنادم راه عايش مخنوق وباغي فين يدوز الوقت ويفوج ويضحك وينسى لهموم ،مدينة ما فيها لا مرجان لا اسيما ، على الأقل مرة ولا جوج في العام  يفرحو  الناس ويضحكو .. فالمهرجان كايخدم الصغير ولكبير ، الشمور والفنان وكايدور  الصرف والحركة خليو الناس يخدمو  باش يعيشو معاهم الدراوش ، شوفو  مدن الصويرة وفاس ومكناس واصيلة ومراكش كل هذه المدن عامرة بالبطالة وشحال من مهرجان وشحال من مؤتمر ، عمر شي فاسي ولا مكناسي ولا مراكشي ما قال واش بقى لينا غير المهرجان.

—————-
شي ناس ولاد لبلاد كايقولو  “واش مدينة بن سليمان كلشي فيها بقى خاصها غير المهرجان…  لا اسيادي ماشي المهرجانات لي خرجو على لبلاد ، راه هاد لبلاد خرجوا عليها بعض رؤساء المجالس والسماسريا ديال الانتخابات والاحزاب والنقابات ديال الكيلو ، خرجو عليها  هادوك لي مخلين البزناسة ديال الماحية والقرقوبي والسيليسيون ولحشيش والشيشة كايبيعو ويشريو مع راسهم، زعما هاد الناس واعين وعايقين كايعجبهم بنادم يتقرقب ويدوخ باش يطيح كومة وميعقلش على العالم وهاد الدوخة راه في صالح أصحاب السياسة والوقت ، شي وحدين منهم باغين بنادم يبقى دايخ مايفكر لا فسياسة ولا في بلدية. شي ناس منهم من زمان وهوما خدامين كايوزعوا في الارض على لحباب والصحاب والنساب قسمو بنادم على جوج طبقة كادحة لي عايشة عيشة الدبانة في لبطانة.. معندها حق لا في تعليم ولا في سبيطار  ولا حتى في الما ولخبز.. عكس الطبقة الأخرى البورجوازية لي كتاكل حقها وحق خوتها المستضعفين كل واحد منها طالع وأكل ونازل وأكل بحال المنشار..علاش باغين تزمطو بنادم ، الناس راه باغين يعيشو ويدورو الحركة ويفرحو وينشطو ماعندهم مايديرو بالسياسة ديالكم .. واش باغينهم يبقاو يتفرجو فيكم بحال الكراكيز ومدينتهم  غارقة فالفقر وفالبؤس و فالأزبال والحيوانات والكلاب والحمير الضالة والمجلس البلدي ديالها شاد العلوة ومدور بيه الشيخات كايشطح على الشعبي ولي بغا يربح العام طويل، ماشي حشومة وعيب باغين تركبو على مهرجان كنصورو فيه غدا الدراري وعشاهم  وكنوفرو ريالات باغين تحرمونا حتى من خدمة 5 ايام .. مدينتنا عامرا زبل برجلين وبلا رجلين ومول الصفقة الخيالية مول الزبل مامسوقش لا لبنادم  ولا للزبل لي هو  هوا الا ماتزادش مايتنقصش. كنت ماباغيش نكتب ومنعاودش نكتب لا على الزبل ولا على الحكرة ولكن ملي دارو ناس لا زين لا مجي بكري.حسن نبقى ساكت لاحقاش الا دخلت فهاد الموضوع غادي نخرج على الموضوع .شي ناس كايقولو واش المدينة خصها غير المهرجان. ايه نعم اسي بن سليمان مخصهاش غير مهرجان واحد ولا جوج.. خصها 6 ولا 7 ديال المهرجانات عرفتو علاش لاحقاش فهاد المهرجانات كايخرجو الناس كايبدلو لحيوط والبشر بالطبيعة ولفراجة وكايتلقاو فيه لحباب والصحاب وكلشي كايخدم..

وعيق وفيق  البريق را كلشي عايق..